Hoe kan dit wees dat berg Everest nie die hoogste berg op aarde is nie? Almal weet en aanvaar tog Everest is die hoogste.

Everest is 8 848 meter hoog. Watter ander berg moet ek dan uitklim om die hoogste berg op aarde uit te klim?

Jy moet na Hawaii gaan en berg Mauna Kea klim. Dit is die hoogste berg op aarde. Berg Mauna Kea is 10 205 meter hoog teenoor Mount Everest se 8 848 meter.

Hoekom weet min mense daarvan en waarom wil almal dan nie eerder berg Mauna Kea in Hawaii as berg Everest in Tibet klim nie?

Omdat berg Mauna Kea wel 10 205 meter van sy voet tot by sy hoogste punt is, maar net 4 205 meter daarvan steek bo die see se oppervlakte uit.  Die res is onder die water! Die antwoord is tegnies dus korrek. Tog is dit misleidend.

Met ’n hoogte van 8 850 meter (29,029 voet) is berg Everest die hoogste berg bo seevlak op aarde. Passasiersstraalvliegtuie vlieg gewoonlik op hierdie hoogte van 9000 meter (30 000 voet) en hoër.
Berg Mauna Kea is omtrent 10 000 meter hoog. Dit is baie hoër as berg Everest wat 8 848 meter is. Mauna Kea staan egter in die see by Hawaii. Met ongeveer 5 800 meter (19 000 voet) van die berg onder die see, steek net 4 205 meter (1 796 voet) bo seevlak uit.

Miskien moet ons die vraag meer wetenskaplik bewoord. Dit behoort kamstige slim, maar misleidende antwoorde, soos hierbo te kan voorkom.

Nuwe vraag: Watter berg moet ek uitklim om op die verste punt van die aarde se middelpunt af, te staan? Dit klink wetenskaplik genoeg om die antwoord vir die hoogste berg op aarde te kry.

Die regte antwoord is: Berg Chimborazo in Puerto Rico, Suid-Amerika. Hierdie berg se hoogste punt is 2 150 meter verder van die aarde se middelpunt af, as wat berg Everest se hoogste punt is. Chimborazo is egter net 6 267 meter hoog. Die berg Chimborazo se hoogste punt is verder van die middelpunt van die aarde af omdat die aarde nie koeëlrond is nie. Die aarde is effens afgeplat op sy pole. Chimborazo lê naby die ewenaar. Die aarde se omtrek by die ewenaar is 40 075 km terwyl dit net 39 940 km by die pole is. Die verskil is 135 km. Berg Chimborazo lê net een graad van die ewenaar af waar die aarde uitbult.  Berg Everest lê baie verder Noord na die pole se kant waar die aarde reeds begin afplat. Dit veroorsaak die 2 150 meter verskil.

Die grys stippellyn hierbo vorm ’n perfekte sirkel. Die aarde se vorm is nie so ’n perfekte sirkel nie en lyk meer soos die bloulyn-figuur. Die aarde is by die pole afgeplat en dit bult uit by die ewenaar. Berg Chimborazo is een graad Suid van die ewenaar geleë. Daarom is die piek van die berg 6 384 kilometer vanaf die middelpunt van die aarde. Dit is twee kilometer verder vanaf die middelpunt van die aarde as wat Everest is wat nader aan die pole is.

Hoekom klim mense dan nog Mount Everest?

Omdat dit steeds die hoogste berg bo seevlak is. Mount Everest se piek is die hoogste punt waarheen ‘n mens kan klim bo seevlak. Dit is dus die berg op die aarde met die dunste atmosfeer op sy hoogste punt.

Alles relatief, kan jy met reg opmerk.

Maar relatief is ook belangrik. Hoe lui die grappie? “Net drie hare op jou kop, is relatief min. Drie hare in jou sop, is relatief baie! ”

Berg Everest is in die Himalajagebergte op die grens tussen Nepal en Tibet geleë. Berg Everest is 8 850 meter hoog. Meeste mense aanvaar dat Everest die hoogste berg op aarde is. Omdat dit so moeilik is, is Everest eers in 1953 vir die eerste keer oorwin toe Tenzing Norgay en Edmond Hillary die piek van die berg bereik het. Meer as 300 bergklimmers is al op die berg dood in pogings om die piek te bereik. Baie is dood vanweë die min suurstof op hierdie hoogte bo seevlak. Die berg is so hoog dat meeste van hierdie klimmers se lyke steeds op die berg lê omdat dit te hoog en te moeilik is om hulle na onder te vervoer.
Berg Mauna Kea, ‘n rustende vulkaan in Hawaii, is 10 205 meter van sy voet af tot by sy hoogste punt. Dit maak dit die hoogste berg op aarde. Omdat die grootste gedeelte van die berg onder die see is, steek net 4 205 meter bo seevlak uit. Mauna Kea beteken in die Hawaiise taal – “Wit berg” omdat daar in die winter sneeu op is. Dit is ’n heilige berg vir die plaaslike Hawaii bevolking.
Berg Chimborazo is ‘n rustende vulkaan in Suid-Amerika in die Andesgebergtes in die middel van Ecuador. Dit het ‘n hoogte van 6 268 meter. Omdat die berg naby die uitbultende ewenaar lê, is die hoogste punt van die berg die plek wat die verste van die middelpunt van die Aarde af is.
Bo-op berg Mauna Kea in Hawaii is een van die grootste sterrewagte in die wêreld met dertien teleskope. Die lug op daardie hoogte (4 205 meter/13 796 voet) het min vog in, daar is geen lig- of lugbesoedeling nie en baie min wolke. Dit maak dit uiters geskik om van daar na die ruimte te kyk. Die geleidelike helling maak ’n toegangspad moontlik om boumateriaal tot op daardie hoogte by die bergpiek te kry om die teleskope te kan bou. Mauna Kea beteken in die Hawaiise taal – “Wit berg” omdat daar in die winter sneeu op is. Omdat dit ’n heilige berg vir die plaaslike Hawaii bevolking is, is daar tans ernstige weerstand teen die bou van enige verdere teleskope op die berg.